Peqqinnissamut tunngasumik ilisimatusarneq
Kalaallit Nunaanni peqqinnissaq pillugu ilisimatusarnerit annertuut ingerlanneqartarput, sumiiffinnilu ilisimatusarnerit amerliartorput kisiannili amerlanertigut Danmarkimi nunanilu allani ilisimatuunit ingerlanneqartunik. Taamaattumik pingaartuuvoq ilisimatusarnerup inerneri aamma Kalaallit Nunaanni najugaqartunit atorluarneqarnissai, aammalu misilittakkanik katersorsimasanik peqqinnissaqarfinni sulisunik aammalu nunami ilisimatuunik avitseqateqarnissaq.
Tamanna tunngavigalugu Grønlands Center for Sundhedsforskning pilersinneqarpoq.
Peqqissaanermik Ilisimatusarfimmi Grønlands Center for Sundhedsforskning, Ilisimatusarfik
Grønlands Center for Sundhedsforskning 2013-imi Ilisimatusarfimmi Peqqissannermut Ilisimatusarfimmut atalluni pilersinneqarpoq. Centerimi professoritut atorfinnik aammalu lektoratinik taamatullu professorimik ilisimatusaammi peqqinnissamut tunngasunik ilisimatusarnerni aqutsisuusussamik pilersitsisoqarpoq. Professorip ilisimatusarnermi siunnersuineq suliaraa taamatullu phD-nngorniartunut pingaarnertut siunnersortiulluni, nunami aammalu nunat tamalaat akornanni ilisimatusarluni suliniutinut ilaasarpoq phD-nngorniannginnermilu aammalu phD-nut pikkorissaanernik ingerlataqartarluni.
Centeri Peqqissaanermik Ilisimatusarfimmi ilaavoq ilisimatusaatingalugulu peqqissaasunngorniarluni ilinniarfimmut ilaalluni, taamatullu Ilisimatusarfimmi pilersaarusiornermi, soorlu ilisimatusarluni pikkorissanermi aviisini ilanngussassanik allannermi, issittumi universitetit aasakkut phD-nut atuartitsinerini aammalu Ilisimatusarfimmi ilisimatusaatit allat Pinngortitaleriffillu suleqatigalugit pikkorissartitsinerinut ilaasarpoq.
Centeri ilisimatusarfinnik Kalaallit Nunaata avataaniittunik ilisimatusarnermi suleqatigiinnissamik isumaqatigiissuteqartarpoq. Dronning Ingridip Napparsimmavissuani nakorsat, Nuummi Nakorsiartarfik aammalu sineriammi peqqinnissaqarfiit arlallit nunami nunallu tamalaat akornanni ilisimatusarluni suliniutini assigiinngitsuni peqataapput. Peqqinnissamut tunngasunik ilisimatusarluni suliniutit arlallit nunat tamalaat akornanni ilisimatusartut attaveqarfiini ilaapput. Sineriammi peqqinnissaqarfimmi sulisut namminneq peqqinnissaqarfimminni napparsimmavimminnilu ilisimatusarluni suliniutini peqaataasimapput. Suliniutit taakku piffimmi, nunami aammalu nunat tamalaat akornanni peqataaffigineqarsimapput.
Ilisimatusarnissamut piareersarneq massakkut nakorsanngorniarluni ingerlariaqqiffiusumik ilinniarfimmi ilaavoq, ilisimatusarlunilu suliniutit kalaallit nakorsaannik ingerlanneqartut nutaat assigiinngitsut aallartinneqarsimapput. PhD-nngorniarluni ilisimatusarnerit nutaat Kalaallit Nunaanni atorfilinnik siunnersuisoqarlutik naammassineqartarput. Ukiuni kingullerni peqqissaasut aammalu ernisussiortut ilisimatusarluni ilinniarfinni suliniutinilu aallartissimapput, pingaartumik inuit peqqissusaannut ilisimatusarnermi.
Kalaallit Nunaanni Peqqinnissaq pillugu Ilisimatusarnikkut Ingerlatat pillugit Siunnersuisoqatigiit
Naalakkersuisuni Peqqinnissamut ilaasortap 1996 novembarimi Kalaallit Nunaanni Peqqinnissaq pillugu Ilisimatusarnikkut Ingerlatat pillugit Siunnersuisoqatigiit pilersippai, Naalakkersuisumut siunnersuinermik, Kalaallit Nunaanni peqqinnissamut tunngasunik ilisimatusarnerit pillugit kajumissaarinermik aammalu suliassaqarfinni suliniutissanut toqqartuinernik suliaqartussanngorlugu.
Uani nittartakkaami: www.peqqik.gl annertunerusumik atuarit.
Nunatsinni Nakorsaaneqarfik
Nunatsinni Nakorsaaneqarfiup nunami peqqinnissap qanoq inissisimanera nakkutigaa. Tamanna pisarpoq nappaatinik tunillaattartunik, kræftimik, inunngortunik – aammalu toqusunik allanillu nalunaarsuinikkut. Nalunaarsuutit peqqinnissamut tunngasunik ilisimatusarnermi pingaaruteqartuupput.
Grønlandsmedicinsk Selskab
Grønlandsmedicinsk Selskab ilisimatusarnikkut peqatigiiffiuvoq Dansk Medicinsk Selskabip ataaniittoq. Peqatigiiffimmi ilaasortaapput, nakorsat saniatigut, Kalaallit Nunaanni issittumilu peqqinnissamut suliassaqarfinni ilisimatusarnernik ingerlatsisut aammalu/imaluunniit soqutiginnittut.
Grønlandsmedicinsk Selskab pillugu uani atuarit: www.gmsnet.dk
Nuna Med
Nuna Med tassaavoq ilisimatusarnermi ataatsimiinneq Kalaallit Nunaanni nakorsaatinik sammisaqartoq ukiullu pingasukkaarlugit Nuummi ingerlanneqartartoq, Grønlands Lægekredsforeningimit, Peqqissaasut Kattuffiannit, Grønlandsmedicinsk Selskabimit aammalu Grønlands Center for Sundhedsforskningimit pilersaarusiorneqarlunilu ingerlanneqartartoq.
NUNAMED qulingiluassaannik ataatsimiinnera 2016-imi Nuummi ingerlanneqarpoq.